عالم ندى

عدم القدرة على اتخاذ القرارات ممكن يكون وراه أسباب كتير اوي: 🟣 خوف من تحمل المسئولية 🟣 خوف من اللوم و النقد 🟣 خوف من الخروج من منطقة الراحة  🟣 عدم ثقة في النفس و بالتالي عدم ثقة في اختياراتي كل الأسباب دي وراها تجارب و خبرات سابقة اتعرضنا لها على مدار حياتنا، زي أهل بياخدوا قرارات بالنيابة عننا، زي موقف صعب مرينا بيه نتيجة لاختيار غلط، و غيرها كتير. تأثير المواقف السابقة بيبقى اغلب الوقت بدون وعي مننا، بمعنى اني مثلا خايف اقرر بس مش قادرة احدد خوفي سببه ايه و لا عارفة اواجهه. الوصول لأصل المخاوف اللي عندنا محتاج مساعدة متخصصة، و الأهم اننا لما نعرف نقرر نواجه و نغير (برنامج الخوف) اللي دماغنا مشغله. إعادة برمجة المخ بتاخد وقت و محتاجة صبر و مثابرة لأن النتيجة تستحق.

ماذا لو قرأت هذا الكتاب؟ ماذا لو خضت هذه التجربة؟ ماذا لو تكلمت بما أشعر؟ ماذا لو تكلمت و لم يعيرني احد اهتمام؟ ماذا لو لم أفعل ما أفعله كل يوم؟ ماذا لو شعرت بالملل؟ ماذا لو نفذت طاقتي فجأة؟ ماذا لو ......؟  ليس لدي أية إجابة... هل لديكي انتي؟

إنما أنا بشر... أخطئ و اصيب احب و اكره اقسو و احنو  أذنب و ا ستغفر اتألم و أحب اضحك و ابكي أنا كل حاجة و عكسها لست ملاك و لست شيطان.... أنا بشر

و انا باقرا الفاتحة في الصلاة و اول ما اوصل لآية (إياك نعبد و اياك نستعين) باحس براحة و اطمئنان و اني مسنودة، و مش اي سند، دة رب العالمين 🩷 مابقتش اخاف من خذلان الناس، رب الناس علمنا الاستعانة بيه، و خلانا نكررها في كل ركعة في كل صلاة. ماتخافوش يا جماعة مهما الظروف كانت قاسية، اعملوا اللي عليكم و سيبوا الباقي على الله، اسعوا و اشتغلوا و الأهم اعبدوه، إياك نعبد و إياك نستعين....

تصور أن طاقتنا الإيجابية و روح الهمة و النشاط حالة مستمرة طول الوقت زي بالضبط تصور أن السماء تمطر ذهباً. لازم نتقبل أن طاقتنا في حالة صعود و هبوط مستمرين، الشطارة اننا نتعلم نتعامل مع الحالتين، يعني اتقبل نفسي لما طاقتي تكون أقل (بدون تمادي في حالة عدم الرغبة في الحركة أو النشاط) و استغلال فترات طاقتي العالية في الإنجاز و السعي. مهم في حالات هبوط الطاقة اننا نسأل طاقتنا و نتحاور معاها: - أنا عارفة انك مش في أحسن حال النهاردة، تفتكري ايه السبب؟ - خلينا نرتاح النهاردة و ندور في قائمة السعادة بتاعتنا ممكن نعمل ايه يغير الحالة دي. - عادي على فكرة ان البطارية يقل شحنها من وقت للتاني، هنشحن و نكمل. الطريقة دي فعالة و مجربة، العناد مع النفس و تجاهل مؤشر البطارية المنخفض مش في صالحنا خالص. جربوا طريقتي و شاركوني النتيجة.